Situado na coñecida como Casa do Coxo, este museo amosa a ligazón de Rianxo co mar. Eixo do proxecto Rianxo, o mar feito tradición, trátase dunha instalación fundamentalmente etnográfica e antropolóxica. Incluíndo detalladas maquetas, ensina o deseño e proceso construtivo de distintas embarcacións, conta cunha pequena biblioteca, unha sala sobre o mar e a pesca, e recrea noutra un obradoiro tradicional de carpintería de ribeira. A oferta cultural de Rianxo ten aquí a súa imprescindible pegada sobre esa íntima e indisoluble relación coa cultura mariñeira.